គូឡាឡាំពួរ៖ នាយករដ្ឋមន្ត្រីថ្មីនៃប្រទេសម៉ាឡេស៊ីលោក អានវ៉ា អ៊ីប្រាហ៊ីម បានបដិសេធការប្រើប្រាស់រថយន្តរបស់រដ្ឋាភិបាលដែលរៀបចំជូននាយករដ្ឋមន្ត្រី ដោយថាលោកមិនចង់ឱ្យមានការចំណាយពីរដ្ឋដើម្បីរូបលោកនោះទេ។

លោក អានវ៉ា បានសរសេរនៅលើហ្វេសបុកផេករបស់លោកកាលពីថ្ងៃទី២៧ ខែវិច្ឆិកា ឆ្នាំ២០២២ ថា៖ «ខ្ញុំចង់ជម្រាបជូនថាកាលពីម្សិលមិញខ្ញុំបានបដិសេធប្រើប្រាស់រថយន្ត Mercedes S600 ដែលបានទិញនិងរៀបចំដោយការិយាល័យនាយករដ្ឋមន្ត្រីមុនពេលខ្ញុំចូលធ្វើការ។ ការផ្លាស់ប្ដូរនេះដោយខ្ញុំមិនចង់ឱ្យមានការចំណាយថ្មីណាមួយធ្វើសម្រាប់ខ្ញុំ»។

លោកបានបញ្ជាក់ថាលោកនឹងប្រើប្រាស់យានជំនិះណាមួយរបស់លោកសម្រាប់ការងារប្រចាំថ្ងៃ។

លោក អានវ៉ា អ៊ីប្រាហ៊ឹម គឺជាប្រធានគណបក្ស Pakatan Harapan (PH) បានក្លាយជានាយករដ្ឋមន្ត្រីទី១០ នៃប្រទេសម៉ាឡេស៊ី នៅថ្ងៃព្រហស្បតិ៍ ទី២៤ ខែវិច្ឆិកា ឆ្នាំ២០២២។

ថ្លែងក្នុងសន្នីសិទសារព័ត៌មានថ្ងៃទី២៥ ខែវិច្ឆិកា ឆ្នាំ២០២២នេះ នៅរាជធានីគូឡាឡាំពួរ លោក អានវ៉ា អ៊ីប្រាហ៊ីម បានលើកឡើងថា លោកនឹងកាត់បន្ថយចំនួនគណៈរដ្ឋមន្ត្រី ខណៈសមាជិកខុទ្ធកាល័យលោកក៏ត្រូវបានស្នើឱ្យកាត់បន្ថយប្រាក់ខែផងដែរ។ លោកបានប្រាប់អ្នកកាសែតថា បញ្ហាដែលត្រូវដោះស្រាយនាពេលបច្ចប្បន្ននេះគឺការកើនឡើងតម្លៃនៃការរស់នៅរបស់ប្រជាជនម៉ាឡេស៊ី៕